Nuk shkëlqejnë kot aq shumë VIP-ët tanë, sepse kanë gjenetikën më "të zgjedhur” apo sikur nuk iu bie mbi fytyrë pluhuri i madh i Kosovës. Një pjesë e madhe e VIP-ëve tanë të ekranit dinë t’ia bëjnë "hyzmetin” vetes, duke shkuar rregullisht në qendrat estetike.

Te poliklinika "Zatriqi” tregojnë se kanë klientë të shumtë pikërisht tani në këtë kohë të cilët trajtohen me botoks kundër rrudhave. Andaj, me përdorimin e rregullt të këtij produkti do të tregojnë gjithmonë 10 vjet më të rinj, tregon Violeta Zatriqi kirurge plastike estetike.

Botoks (toksina e botulinumit), prodhohet nga bakteria Clostridium botulinum. Botoksi, duke bllokuar lëshimin e molekulave që bëjnë të mundur komunikimin ndërmjet qelizave nervore, bllokon gjithashtu komunikimin e organeve përkatëse me këto qeliza.

"Në kirurgjinë plastike botoks përdoret me qëllim që të zvogëlojë rrudhat e krijuara nga muskujt e mimikës në sipërfaqen e fytyrës si dhe të zvogëlojë djersitjen e disa pjesëve të trupit kryesisht të nënsqetullave”, thotë Violeta.

Sipas kirurges, duke përdorur botoks zvogëlohet lëvizja në muskujt e mimikës, e cila bën të mundur që lëkura që vesh këto muskuj të mos tendoset si zakonisht. Vizat e krijuara nga lëvizja e muskujve si dhe nga palosja e tyre zhduken.

Violeta pohon se moshat të cilat mund të përdorin botoks janë prej 30 deri në 55-vjeç, ndërsa pas moshës 55-vjeç nuk ka mundësi ngase nuk ka efekt.

"Çmimi për një përdorim të botoksit kushton prej 300 deri 500 euro, ndërsa për femrat nëse rrudhat janë të vështira apo për ata që duan të mos u duket asnjë vijë sado e lehtë në mimikë, kostoja mund të shkojë edhe më tepër se 500 euro. Mbushjet e rrudhave duhen bërë sistematikisht çdo 6 muaj”, thekson ajo.

Botoksi injektohet dhe është një procedurë që nuk ka nevojë për anestezi, por vetëm me anë të injektimit. Për zvogëlimin e lëvizjeve të muskujve injektohet brenda muskujve, kurse për zvogëlimin e djersitjes brenda në lëkurë. Efekti i botoksit fillon brenda javës dhe efektiviteti i tij vazhdon nga 3-9 muaj mesatarisht 6 muaj.

"Përveç gjinisë femërore të cilat në masë të madhe përdorin botoks, kohëve të fundit janë shtuar shumë gjinia mashkullore. Por megjithëkëtë shumë njerëz të tjerë të ekranit, gjithmonë me xhepin plot, biznesmenë, politikanë, artistë, përgjithësisht mbahen anonimë. Asnjëri nga personalitetet tona publike qoftë të skenës së artit apo politikës nuk pranon se ka bërë ndonjë ndërhyrje kirurgjike në trupin e tyre. Ndërsa përkundër saj pjesa dërrmuese e tyre përdorin në masë të madhe botoksin në fytyrën, qafën dhe sqetullat e tyre”, përfundon Violeta./Showbiz