Bujar Qamili është një këngëtar i mirënjohur
shqiptar nga Shkodra. Ai është ndër këngëtarët më të mirë të këngës
popullore shqiptare e veçanërisht të asaj shkodrane. Gjatë karrierës së
tij muzikore mbi 20 vjet ka marrë çmime të shumta nëpër festivale të
ndryshme. Së fundi ishte pjesëmarrës në "100 këngët e shekullit” të
organizuar nga TV Klan.
"Ishte një nder i madh për mua të marr pjesë në këtë ngjarje më të
rëndësishme të të gjitha kohëve që janë organizuar deri tani në Shqipëri
për këngën popullore shqiptare. Unë përfaqësova këngën popullore
shkodrane, atë këngë që ka qenë gjithmonë e bukur dhe që është kënduar
me shumë pasion nga ana ime dhe e gjithë njerëzve në përgjithësi”, ka
thënë ai për "Zërin”.
Përveç këngës popullore Bujari pëlqen edhe baladat, në të cilat thotë
se ka pasur shumë sukses. Ndonëse nuk e mohon faktin se në Kosovë është
më lehtë për të depërtuar, meqenëse sipas tij disa nga këngëtaret më
shumë ekspozojnë trupin sesa që interpretojnë bukur.
"Faktikisht me ndryshimin e kohës pati disa probleme dhe në art,
sidomos në Kosovë, ku orientalizmi është më i pranueshëm në këngë. Kjo
ndodhi dhe në Shqipëri në vitet e transicionit, ku u deformua pak kënga
shqipe nga disa këngëtarë që i thonë vetes këngëtarë. Këto filluan me
disqe dhe kaseta shumë të ndyra, madje na dolën dhe disa këngëtare, të
cilat këndonin me minifund për të mbuluar zërin, por ne në art i themi
ligji i kompozimit, që do të thotë atë që s’e bën dot me zë, mundohesh
ta bësh me tjetër gjë, por kjo nuk vazhdon gjatë”, thekson ai.
Fitimi i majmë
Sipas Bujarit, profesioni i këngës të sjell mjaft fitim, por nuk e përjashton faktin se këngëtarët e Kosovës fitojnë më shumë.
"Edhe ne patjetër fitojmë nga kënga, pak me vonesë, jo si këngëtarët
në Kosovë që fitojnë shumë, por ne duke pasur parasysh sistemin në të
cilin kemi jetuar, e kemi pasur vështirë”, shton ai. Suksesi më i madh i
Bujarit gjatë karrierës së tij muzikore, janë çmimet me të cilat është
nderuar nga udhëheqësit e shtetit.
"Unë kam pasur shumë suksese në jetë, nuk më ka njohur vetëm populli,
por edhe shteti, në vitin 2001 presidenti i asaj kohe z. Rexhep Mejdani
më jep urdhrin "Naim Frashëri i Artë” që do thotë artist i merituar.
Pas saj në vitin 2009 presidenti aktual z. Bamir Topi më jep titullin e
lartë "Mjeshtër i Madh” - Artist i Popullit” thekson ai. Bujari tani ka
nisur përgatitjet për albumin e ri, në të cilin thotë që do të dominojnë
stilet e këngëve që i pëlqejnë më së shumti. "Albumi që jam duke punuar
do të ketë këngë shkodrane, kosovare dhe këngë nga Shqipëria e Mesme”,
besoj se do t’iu pëlqejë të gjithëve”, shprehet ai.
Përveç këngës Bujari është i dhënë edhe pas futbollit, ku pjesën dërrmuese të kohës së lirë e kalon duke u marrë me këtë sport.
"Kohën e lirë në shumicën e rasteve e kaloj në futboll. Jam shumë
tifoz me Vllazninë e Shkodrës, ku dhe i kam bërë dy këngë për futbollin,
të cilat janë pëlqyer shumë. Përveç këtij sporti, jam i dhënë edhe pas
biliardos”, përfundon Bujari./Showbiz
