Këngëtarja Aurela Gaçe me anë të një konference për shtyp të mbajtur sot në kinemanë ABC promovoi këngën fituese të festivalit të 49-të që organizoi RTVSH-ja, me të cilën do ta përfaqësojë Shqipërinë në festivalin "Eurovision 2011”.

Ardhjen e Aurelës në Kosovë e mundësoi Radiotelevizioni Publik i Kosovës, i cili njëherësh do të transmetojë drejtpërdrejt festivalin Eurovision që këtë vit mbahet në Dyzeldorf. Në konferencë, përveç Aurelës, ishin prezentë edhe Martin Lekaj, drejtor i RTVSH-së dhe Bekim Hasani nga RTK-ja.

"Jemi të kënaqur që këtë vit Shqipëria do të prezantohet me një këngë mjaft domethënëse, e cila shpresojmë se do të arrijë suksese” është shprehur z. Lekaj. Kënga "Fel the Passion” sipas disa sondazheve deri tani është e radhitur në vendin e 4-t, për të cilin fakt Aurela ndjehet e lumtur.

"Kënga është e realizuar nga Shpëtim Saraçi, Sokol Marsi dhe Aldo Shllaku, një këngë me shumë kuptim, e cila besoj se do të më sjellë shumë fat” është shprehur Aurela. Tani kjo këngë do të promovohet edhe në disa vende evropiane.