Veshjet e gjëra sportive të stilit rap, i ka
zëvendësuar me kostume dhe kollare. Kantautori i njohur kosovar, Genc
Prelvukaj, iu është futur seriozisht politikës. Me të ardhur në postin e
ministrit të MKRS, Memli Krasniqi, i ka ofruar Gencit një post shumë të
rëndësishëm në kabinetin e tij.
Duke qenë miq dhe kolegë prej vitesh, Genci i cila ka studiuar
shkencat politike, jo vetëm që është këshilltar i ministrit Krasniqi,
por duket edhe një nga personat më të besueshëm në kabinetin e tij.
Në këtë intervistë që Prelvukaj e dha për "Zërin” ka theksuar që se
bashku me ministrin Krasniqi ashtu siç kanë ditur të bëjnë punë të mira
në muzikë do të bëjnë edhe në pozitat që gjenden sot.
Nga rep muzika në politikë. Ishte kjo rrugë e gjatë?
- Do të ishte më mirë të thuhej "nga muzika në përgjithësi” dhe jo
të përkufizohet vetëm me një zhanër, pasi që kam qenë i angazhuar shumë
edhe në drejtimet tjera në muzikë. Inkuadrimin në politikë nuk e shoh
si rrugë të gjatë, sepse është vetëm nisma e një pune të re.
Çfarë ju tërhoqi që të futeni në politikë?
- Fillimisht lidhet me natyrën e njeriut, e pastaj edhe më bindjet
e perceptimet që një individ i ka në raport më shoqërinë dhe detyrimin
ndaj saj. Nuk ekziston ndonjë moment joshës, por, me saktësi te
padiskutueshme them se ishte fushë ku unë kisha interesim që një kohë të
gjatë. Vetë fakti që e kam studiuar politikën ka qenë një indikacion që
në një ardhme do të jam edhe brenda saj, qoftë si njeri qe e kupton si
shkencë dhe merret me analizën e saj, qoftë edhe si zbatues i formave të
saj.
Tashmë jeni këshilltar i ministrit të MKRS, z. Memli Krasniqi. Si erdhe deri këtu?
- Ishte përcaktim i vetë ministrit që unë të jam pjesë e kabinetit
politik të tij. Është një detyrë më shumë përgjegjësi dhe mundohem të
bëj më të mirën në atë aspekt.
Njiheni edhe për miqësinë që keni me z. Krasniqi. Ishte kjo një përparësi për të ardhur në këtë post?
- Miqësia është gjë e çmuar në shumë aspekte, por jo edhe faktor
determinues për ngritjen në një pozicion të caktuar. Kualifikimi
profesional është dhe duhet të jetë kushti i vetëm në një punë që ka
përgjegjësi. Me ministrin kemi një miqësi të vazhdueshme dhe raporte
korrekte që nga fillimet tona më muzikën. Kemi bërë punë të mira me
muzikën dhe kam bindjen se do të bëjmë punë të mira bashkë edhe në këtë
pozicion ku ndodhemi sot.
Cilët janë hapat urgjentë që ju dhe ministri Krasniqi jeni duke i ndërmarr për kulturën tonë?
- Çdo çështje që përkon me detyrimet e Ministrisë së Kulturës,
Rinisë dhe Sportit shikohet me kujdes të veçantë. Ministri ka vënë
theksin e tij në shumë fusha në të cilat punojmë më qëllim përmirësimin e
gjendjes ekzistuese.
Çfarë do të bëni konkretisht rreth mosfunksionalizimit të ligjit për të drejtat e autorit?
- Ligji për të drejtat e autorit dhe të drejtave tjera të
përafërta është një ndër pikat me të ndjeshme më të cilat merremi çdo
ditë. Është më se evidente nevoja për funksionalizimin e tij në
përgjithësi dhe ne jemi shumë të vetëdijshëm për këtë gjë. Kemi bërë
lëvizje të duhura në këtë drejtim dhe vazhdojmë që çështjen në fjalë ta
hedhim çdo ditë përpara . Unë kam besim se do të rregullohet shumëçka në
sferën e të drejtave të autorit gjatë ditëve në vazhdim.
A duhet të shpresojmë që me këtë mandat muzika dhe kultura jonë do të vihet një herë e përgjithmonë në binarët e saj?
- Mundohemi të bëjmë më të mirën e mundshme. Unë jam i sigurt që shumë gjëra do të vijnë në vendin e vet shumë shpejt.
Kohë më parë ke pas thënë se albumi i fundit "Etnon” do të jetë
edhe i fundit në karrierën tuaj muzikore. Veprimtaria juaj si këngëtar
dhe producent është tashmë profesion që i takon së kaluarës apo…?
- Jo, nuk kam dhënë shenja se mund largohem nga skena. Mund të
ndodhë dikur, por në një të ardhme të afërt assesi jo. Vazhdoj të jem me
publikun në çdo vend ku ka kërkesë. Këtë vit nuk do të ketë album,
ndërsa realizime këngësh sigurisht se po. "Etnon” vazhdojnë…
