Disa ditë më parë "Shqiptari i Italisë" botoi dy artikuj mbi vajzën shqiptare Rea Beko, e cila bëri pjesë në grupin e atyre të rejave që vizituan udhëheqësin libian, Muhamar Gadafi gjatë vizitës së tij në Romë. E më tej, e ftuar prej tij bashkë me një grup vajzash të tjera për të vizituar Libinë.

Lajm i vjetër, deri ditën kur pas nisjes së bombardimeve në shtyp, shqiptarja Rea Beko deklaroi për ANSA-n se "Gadafi nuk është diktator". E megjithatë ajo pohon se nuk e pëlqen Gadafin.

"Para të gjithash dua të them që unë nuk e adhuroj Gadafin! Di vetëm të them që për aq sa munda të flas e të bisedoj m'u duk një plak i urtë, që dinte se ç'bënte për vendin e tij. Pikërisht për këtë kemi arritur deri këtu! Sepse forcat e mëdha e kuptuan që Libia po fitonte një pozitë të fortë në Afrikë dhe në Mesdhe dhe ja, vendosen ta sulmojnë. Nuk mund të them që është diktator sepse ç'pashë me sytë e mi demonstronin një popull që e donte dhe e përgëzonte për faktin që dinte të mbronte interesat e Libisë," përfundoi Rea.